2023 жылдың ақпанның 24-26 аралығында әл-Фараби атындағы Оқушылар сарайында Оқу-ағарту министрлігі мен USTEM Robotics қоғамдық қорының қолдауымен робототехникадан Орталық Азия чемпионаты өтті. Жеңімпаз оқушылар АҚШ-та өтетін дүниежүзілік жарысында ел намысын қорғайды.

  «Биылғы маусым Энергия тақырыбына арналған. FIRST жарысында балалар роботтарды бағдарламалау мен құрастырудан басқа, инновациялық жобамен айналысып қана қоймай, сондай-ақ бүгінгі қоғамның маңызды мәселелерін шешуге тырысады. Былтырдан бастап әр команда әлеуметтік желілерде #FIRSTKZ2023 хэштегімен көптеген тапсырма орындады. Соның ішінде балалар түрлі энергетикалық станциялардан репортаждар ұйымдастырып, энергетика саласының мамандарынан сұхбат алып, оқу орындарында шеберлік сабақтарын өткізді. Ең қызығы, біздің оқушылар жарысқа дайындық аясында өздерінің тәжірибелерімен қазақстандық мықты жоғары оқу орындарының студенттерімен бөлісті. Бір байқағанымыз, робототехникамен айналысатын балалардың саны жыл сайын артып келеді. Бұл Оқу-ағарту министрлігінің қолдауының арқасында мүмкін болды. Бірігіп жасаған еңбектің нәтижесінде 2022 жылдың қазан айында біздің оқушылар Женевада өткен Дүниежүзілік жарыста (FIRST Global Challenge) жеңіске жетті. Биыл да жас өнертапқыштарымыз жеңіске жетеді деп сенеміз», - деді USTEM Robotics қорының жетекшісі Асылбек Мырзахметов.

  Естеріңізге сала кетейік, соңғы 3 жылда Қазақстанда 3 мыңнан астам робототехника кабинеті ашылды. Екі мыңнан астам мұғалім робототехника курстарынан өтті.

  Үш күнге созылған жарыста оқушыларымыз IT-саласында мықты екендерін тағы бір рет дәлелдеді. Бұл додада кіл мықтылардың арасынан Алматыдағы республикалық физика-математикалық мектептің оқушылары суырылып шығып, жеңіске жетті. Жеңімпаз команда жобаларын халықаралық деңгейде АҚШ-тың Хьюстон қаласында қорғайтын болады.