Астаналық мектеп оқушылар Microsoft корпорациясының жарты миллион долларлық грантын жеңіп алды. Арсен Қылышбек пен Владимир Борзенков жасанды интеллект негізінде стартап жобасын әзірлеген.

 

Арсен мен Владимир республикалық физика-математика мектебінің оқушылары. Оларды бағдарламалауға деген қызығушық біріктіріп, уақыт өте бұл достыққа ұласқан. Олар үнемі бірдеңе ойлап тауып, әдеттен тыс жобалар жасауға құмар. Идеялардың бірі табысқа әкелген. Оқушылар жасанды интеллект негізінде небәрі бір жарым минутта толыққанды веб-сайт құра алатын онлайн сервис жасаған. Бұған ұқсас басқа жүйе жоқ екені айтылды. Идея Microsoft корпорациясының назарын аударатындай қызық болған. Компания студенттерге 550 000 доллар грант берді.

Жоба әлі аяқталған жоқ. Арсен мен Владимир соңғы мәліметтерді пысықтап, келесі аптада іске қоспақ.

Жас IT мамандар  бұл жобамен Еуропа мен АҚШ нарығына шығуды жоспарлап отыр. Онлайн-платформа іске қосылғаннан кейін мектеп оқушылары оны дамытуды қаржыландыратын ірі инвестор табуға үмітті.