Қоғамда дау тудырған мәселеге қатысты Сыртқы істер министрлігінің өкілі жауап берді. Қытаймен арадағы визасыз режим қалай жүргізілмек?

  «Кейінгі кездері қоғамда Қытай мен Қазақстан арасындағы визасыз режимге қарсы пікірлер айтылып жатыр. Бұл келісімге қол қойылмады. Оған қол қойылса ғана күшіне енеді. Екіншіден, былтыр жаздан бері Қытай азаматтары Қазақстанға 14 күнге визасыз келе алады. Қазақстан көшелерінде қытайлар көп жүрген жоқ. Енді 14 күнге келетін азаматтар 30 күнге келе алады. Келісім Қазақстанға да тиімді болмақ. Егер келісімге қол қойылса, Қазақстан азаматы Қытайға 30 күнге визасыз бара алады», - деді А. Смадияров.

  Оның айтуынша, егер адам 30 күннен аса елде болса, ол міндетті түрде жазаланады. Визасыз режим туристік әрі іскерлік сапарларға арналып отыр. Осы орайда келісімшарттарды бекіту, консультация жүргізу, сондай-ақ басқа да іскерлік қатынастарға бағытталған. Бұл тұрғыда жұмысқа орналасуға рұқсат етілмейді.

  «Сондай-ақ, жүк көлігін жүргізушілер де визасыз кіре алады. Бұл біраз мәселені шешеді. Қос ел арасындағы сауда-саттық өсіп, өңіраралық ынтымақтастық нығаяды, экономикамызға әсер етеді. Қытай – алпауыт экономикасы бар мемлекет. Қазақстан – Орталық Азияда Қытаймен визасыз режим орнатқан жалғыз мемлекет. Мұны біз дипломатиялық жеңіс деп есептейміз», - деді ресми өкіл.