Ауыл шаруашылығы министрі Ербол Қарашөкеев Қостанай облысына шегірткеге қарсы күрес бойынша қабылданып жатқан шараларды бақылау үшін барды. Ақтөбе облысында шілденің 8-нен бастап ауыл шаруашылығы вице-министрі Әбілхайыр Тамабек жүр, - деп хабарлайды Qlife.kz тілшісі Primeminister.kz сайтына сілтеме жасап.

Қостанай және Ақтөбе облыстарында шегірткелердің екі түрі кең таралған: италиялық прус және азиялық шегіртке.

9 шілдедегі жағдай бойынша Қостанай облысында шегірткелерден арылтуға жоспарланған 422,9 мың гектар жердің 356 мың гектарына тиісті жұмыстар жүргізілді. Облыстың 10 ауданында (Жангелді, Амангелді, Алтынсарин, Денисов, Федоров, Сарыкөл, Қамысты, Наурызым, Қостанай, Қарабалық) және Арқалық қаласында шегірткені жою жүргізілді.

Ақтөбе облысының аумағында 9 шілдедегі жағдай бойынша 667,865 мың гектар жер, оның ішінде италиялық прусқа қарсы 646,965 мың гектар немесе жалпы өңделмек жердің 99,97 %-ы, азиялық шегірткеге қарсы 20,9 мың гектар немесе жалпы өңделмек жердің 95,5 %-ы өңделген.

Химиялық өңдеулерді жүргізу үшін Қостанай облысында 9 желдеткіші бар сепкіш, 3 ұшақ, 6 дельтаплан, 13 аэрозольді газ генераторы жұмылдырылды. Ақтөбе облысында 56 арнайы сепкіш техника, оның ішінде 19 желдеткіші бар сепкіш, 19 аэрозольді газ генераторы, 8 аса жеңіл-авиация кемесі және 10 ұшақ бар.

Жалпы республика бойынша италиялық шегірткеге қарсы өңдеу 1,2 млн гектарға немесе 92,3 %-ға жүргізілді. Жұмыстар Алматы, Атырау, Шығыс Қазақстан, Жамбыл, Жетісу, Батыс Қазақстан, Қарағанды, Қызылорда және Павлодар облыстарында толық аяқталды.