Президент Қасым-Жомарт Тоқаев Маңғыстау облысы Мұнайлы ауданының тұрғынының Тұщы су тапшылығына қатысты өтінішіне назар аударды. Мемлекет Басшысы Үкімет пен облыс әкімдігіне бұл мәселені қысқа мерзімде шешуді тапсырды. Үкіметтің хабарлауынша, бүгінгі таңда аймақтағы су тапшылығы ең маңызды мәселелердің бірі. Тәулігіне шамамен 77 200 м3 құрайтын ауыз судың жетіспеушілігі әсіресе жаз мезгілінде айқын көрінеді.

Мұнайлы ауданында күрделі жағдай қалыптасуда. Қазір "Каспий" тұщыландыру зауытында істен шыққан сорғы қондырғысын жөндеуге байланысты ауданға су беру тәулігіне 13 мың м3-тен тәулігіне 10 мың м3-ке дейін төмендеді. Аудан тұрғындары арасында түсіндіру жұмыстары жүргізілуде.

Мәселені кезең-кезеңімен шешу үшін өңірде тұщыландыру зауыттары мен қондырғыларының құрылысы жүргізілуде. Халық санының жыл сайынғы өсуін ескере отырып, "Каспий" тұщыландыру зауытының қуатын тәулігіне 20 мың м3 ұлғайту қажеттігі бар, бұл тәулігіне 40 мың м3 ауыз су беруге мүмкіндік береді.

Осы мақсаттарға Үкімет резервінен 5,6 млрд теңге бөлу туралы шешім қабылданды.

Мұнайлы ауданының сумен жабдықтау жөніндегі қызмет көрсететін ұйымы - "Маңғыстау жылу". Ауыз су тапшылығына байланысты "Маңғыстау жылу" МКК кестеге сәйкес су құбыры арқылы халыққа су жеткізеді. Сондай-ақ, суды аудан тұрғындарының өтініштері бойынша су таситын көліктер әкеледі.

"Каспий" тұщыландыру зауытының қуатын тәулігіне 40 мың м3 дейін жеткізу жөніндегі жобаны іске асыру Мұнайлы ауданы мен Қарақия ауданы Құрық ауылының тұрғындарын үздіксіз сумен қамтамасыз етуге және бар тапшылықты толығымен жабуға мүмкіндік береді.